وأنا خارج من صلاة الجمعة وماشي على الرصيف إلا وتجي عيني على عم معتوق وأشوف الراجل يكلم نفسه ويخبط في يده أخماس في أسداس وأجي جنبوا وأقول له كيفك يا عم معتوق إلا والراجل مسكني من يدي وقال تعال نوقف في الظلة بدل ما تحرقنا الشمس وأنا أقول لك ايش الهرجة، اسمعوا ايش قال الراجل، ركز معايا واسمعني ايش راح أقول يبو فتو، أكرمني الله سبحانه وتعالى أنا وعائلتي في إجازة الحج بزيارة مدينة رسول الله عليه أفضل الصلاة والسلام وكانت المنطقة المركزية والفنادق ما شاء الله تبارك الله مزحومة بالزوار من جميع مناطق المملكة، لكن حبايبنا أصحاب الفنادق ما قصروا سلخونا صح وفين يوجعك يا مليح، ماعلينا، حلال عليهم الله يرزقهم برزقه بس برضو الرحمة حلوة، لكن اللي عكنن على زوار المسجد النبوي بعض التصرفات من بعض الشباب والبنات واللي الواحد يستحي انه يتكلم عنها والله تصرفات يندى لها الجبين معقولة توصل هادي التصرفات إلى هادي الدرجة من قلة الأدب والحياء لكن للأسف ما احترموا قيمة المكان اللي هما فيه ولا احترموا نفسهم فكانت التجمعات الشبابية من غير حسيب ولا رقيب فكنا نشوف شباب طيحني ببناطيلهم المقززة في أشكالها وألوانها وبنطلون (سكييني) وما يلبسوه إلا العصاعيص من البنات والشباب هدا غير بناطيل البرمودا والتيشرتات الغريبة الألوان والأشكال والصور، وتسريحات الشعر المختلفة، من جد (أهل العقول في راحة) وماشين عادي في المنطقة المركزيه لا عيب ولا خجل من أشكالهم ومن أنفسهم .. وكنا نروح للصلوات وخاصة صلاة الفجر وهما عايشين في تجمعاتهم حتى ما فكروا يقوموا يصلوا فرض الفجر وكل واحد منهم ماسك اللي اسمه البلاك بيري وما في إلا مسخرة وقلة حياء ومرقعة .. والمصيبة مو هنا المصيبة انه بعض البنات نسأل الله انه يهديهم ويصلحهم يجبروهم على كدا بتبرجهم كأنها رايحه زواج ومو داخلة مسجد رسول الله هدا غير انه أصواتهم وضحكاتهم ودلعهم وغنجهم كان ينشاف وبينسمع للرايح والجي ونسيوا انه صوتهم (عورة) والله يرحم حريم وبنات زمان اللي الحياء والحشمة والعفاف كانت تاج روؤسهم .. والمصيبة لما تجي تنصحها وتقول لها يا بنتي استري نفسك ترد عليك بقلة حياء ولسان طويل مو شغلك أنا أعرف مصلحة نفسي، (صدق من قال اللي استحوا ماتوا) لكن الحق مو عليهم الحق على آباءهم وأمهاتهم وأهاليهم تركوهم يسرحوا ويمرحوا بهادي الأشكال المقززة والمقرفة عشان كدا أتمنى من المسؤولين في المدينة المنورة وخاصة في المنطقة المركزية وعلى راسهم هيئة الأمر بالمعروف والنهي عن المنكر انهم يشوفوا حل لهادا التجاوزات من بعض الشباب والبنات ويحاسبوهم على تصرفاتهم وتكون هناك إجراءات قوية وصارمة بحقهم عشان يعرفوا انه هدا المكان مدينة سيدي وحبيبي محمد رسول الله عليه أفضل الصلاة والسلام، والله يهدي ما خلق.. وعيشوا كتيييير تشوفوا كتيييييير.
هرجة: إذا وصلت أخلاق وتصرفات بعض (وخلوا بالكم من كلمة بعض) بناتنا وشبابنا إلى هادي الدرجة من قلة الأدب والحياء فقولوا على الدنيا السلام.
هل تعلم أن الأفعى المجلجة (ذات الأجراس) تعيش في صحاري أميركا وسهولها. وهي تصطاد القوارض بعد أن تحدد موقعها بواسطة أعضاء حساسة للحرارة واقعة بين العينين والمنخرين تكشف التغيرات في حرارة جسم الفريسة.
v2.0.5 
